पनौती/पनौती नगरपालिका–८, खरिबोटका राजु के.सी. ले आफ्नो पत्नीको स्मृतीमा भालेश्वर माध्यमिक विद्यालय, मल्पीमा छात्रवृती कोष स्थापना स्थापना गरेका छन्।
पत्नी तुलसाको स्मृतीमा के.सीले ७ लाखको तुलसा स्मृती छात्रवृति कोष स्थापना गरेका हुन् । कोषबाट वार्षिक रुपमा व्याज रकम प्रदान गर्ने गरी विद्यालयमा कक्षा १ देखि १० सम्म अध्ययरत १/१ जना गरिब तथा जेहेन्दार विद्यार्थीलाई हरेक वर्ष छात्रवृति प्रदान गरिनेछ ।
दाता राजु के.सी र श्रीमती तारा भट्टराई केसीले उक्त रकमको चेक विद्यालय व्यवस्थापन समितिका अध्यक्ष राजेन्द्र के.सी, शिक्षक अभिभावक संघका अध्यक्ष सन्तोषकुमार केसी र प्रधानाध्यापक रामचन्द्र थापालाई हस्तान्तरण गरेका हुन् ।
पुष २८ गते नगरप्रमुख रामशरण भण्डारी, वडा अध्यक्ष बेदप्रसाद बञ्जारा समेतको उपस्थितीमा विद्यालय र केसी परिवारविच कोष सञ्चालन गर्ने सहमतिपत्रमा हस्ताक्षर भएको थियो ।
२०२८ सालमा साविक भूमिडाँडा गाविसमा बाबु भक्तबहादुर र आमा ललितकुमारीको कोखबाट जन्मिएकी तुलसा र राजुविच २०४४ सालमा विवाह भएको थियो । १ बर्षअघि तुलसाको हृदयघातबाट मृत्यु भएको थियो । तुलसा र राजुका १ छोरा र १ छोरी छन् । छोरी दिपा केसी, छोरा अमित केसी र बुहारी रोशी विदेशमा छन् । विद्यार्थीहरुको चौतर्फी विकास र हितका लागि कोष स्थापना गरिएको के.सी.ले जानकारी दिए ।
दाता केसीका बुबा लिलाबहादुर केसी उक्त विद्यालयका संस्थापक मध्येका हुन् । साविक मल्पी गाविसका पूर्वप्रधानपञ्च रहेका लिलाबहादुर उक्त विद्यालय व्यवस्थापन समितिका पूर्व अध्यक्ष समेत हुन् । उनका जेठा छोरा प्रदिप केसीले पनि सोही विद्यालयमा बुबाको स्मृतीमा अक्षयकोष स्थापना गरेका छन् ।
यसैगरी पनौती निवासी ध्रुव दाहाल र श्रीमती गिता तिमल्सिना दाहालले आमा विन्दादेवी दाहालको स्मृतीमा स्थापना गरेको कोषमा ५० हजार रुपैयाँ थप गरेका छन् । दाहाल दम्पतीले यसअघि १ लाख १ हजार १ सय ११ रुपैयाँको कोष स्थापना गरेका थिए ।
बिहिबार श्रीमती गिता तिमल्सिना दाहालले थप गरिएको रकमको चेक विद्यालय व्यवस्थापन समितिका अध्यक्ष राजेन्द्र के.सी, शिक्षक अभिभावक संघका अध्यक्ष सन्तोषकुमार केसी र प्रधानाध्यापक रामचन्द्र थापालाई हस्तान्तरण गरिन् । चेक हस्तान्तरण गर्दै दाहालले प्रत्येक बर्ष रकम थप गर्दै लैजाने प्रतिवद्धता जनाइन् । दाहाल उक्त विद्यालय व्यवस्थापन समितिको सदस्य समेत हुन् ।
विद्यालय व्यवस्थापन समितिका अध्यक्ष राजेन्द्र केसीले आवस्यकता पर्ने र उत्कृष्ट विद्यार्थीलाई छात्रवृति लगायतमा कोष प्रयोग हुने बताए ।
शिक्षक अभिभावक संघका अध्यक्ष सन्तोषकुमार केसीले सहयोगप्रति आभारप्रति आभार प्रकट गर्दै सदुपयोग हुने प्रतिवद्धता व्यक्त गरे ।
