काठमाडौं । असार १५ को अवसरमा राष्ट्रिका साहित्य प्रतिष्ठानले ‘उर्वरा उत्सव’ काव्य वाचन कार्यक्रम आयोजना गरेको छ।
कार्यक्रमको उद्घाटन वरिष्ठ देउडा गायक नन्दकृष्ण जोशीले पानसमा बत्ती बालेर गरेका थिए। उनले कर्णाली र सुदूरपश्चिम क्षेत्रको लोकसंस्कृतिको चर्चा गर्दै देउडा वाचनसमेत गरे। उनले राष्ट्रिका र सुदूरपश्चिमबीच सहकार्य गरेर सांस्कृतिक भ्रमण कार्यक्रम आयोजना गर्न सुझाव दिए।
नेपाल स्रष्टा समाजका अध्यक्ष श्रीओम श्रेष्ठ 'रोदन'ले असार १५ को भावनात्मक र कृषिसम्बन्धी पक्षलाई उजागर गर्दै भने, “कविताबाट खेतमा पुगेजस्तो महसुस भयो। असार १५ मात्र खेत, आली, हिलोको विषय होइन, आम किसानका समस्या पनि हो। नेपालले हरेक वर्ष ४० अर्ब रुपैयाँ बराबरको धान आयात गर्छ, कविहरूले यस्ता गम्भीर विषय पनि उठाउनु जरुरी छ।”
कार्यक्रममा साझा प्रकाशनका अध्यक्ष शेखर गिरी, लेखक तथा सञ्चारकर्मी राजेश खनाल, अनेसास नेपाल च्याप्टरका अध्यक्ष राजेन्द्र केसी, नेपाल लेखक संघका अध्यक्ष वियोगी बुढाथोकी, उपन्यासकार समाज नेपालका अध्यक्ष शंकर भारतीलगायत वक्ताहरूले असार १५ को सांस्कृतिक र सामाजिक महत्वबारे धारणा व्यक्त गरे।
कार्यक्रमको अध्यक्षता गरेका प्रतिष्ठानका अध्यक्ष ऋषभदेव घिमिरेले असार १५ मा किसान जस्तै कविहरू पनि भावना रोप्न हतारिएको उल्लेख गरे। उनले प्रतिष्ठानका हालका गतिविधि र प्रकाशनसम्बन्धी जानकारीसमेत प्रस्तुत गरे।
काव्य वाचन सत्रमा श्रीबाबु कार्की, मनोजादित्य न्यौपाने, गोकुल अधिकारी, देवेन्द्र के.सी., एलिसा ढुँगाना, सुष्मा आचार्य, त्रिभुवनचन्द्र वाग्ले, डा. शान्तिमाया गिरी, रचना खनाल जोशी, डा. सिर्जना शर्मा, मुकुन्द पौडेल, निर्मलरमण पराजुली, सुमन वर्षा, प्रदीप सापकोटा, माधव विडारी र शेखर गिरीलगायत कविहरूले असार विषयक विभिन्न कविता वाचन गरे।
कार्यक्रममा सहभागीहरूले असार १५ को परम्पराअनुसार दही चिउरा खाएर सांस्कृतिक परम्परालाई निरन्तरता दिएका थिए।
कार्यक्रमको स्वागत मन्तव्य प्रतिष्ठानकी उपाध्यक्ष डा. शान्तिमाया गिरीले दिएकी थिइन् भने सञ्चालन महासचिव तथा कवि-मिडियाकर्मी मधु पाठकले गरेका थिए।
