काठमाडौं । प्रथम मदन आश्रित स्मृति नकआउट सेभेन ए साइड खुला फुटबल प्रतियोगिता जेठ ३ गतेदेखि सुरु हुने भएको छ ।
नेपाल पिपुल्स भोलेन्टियर्सले सोमबार पत्रकार सम्मेलनमार्फत प्रतियोगिता जेठ ३ गतेदेखि ८ गतेसम्म हुने जानकारी दिए ।
युवा संघ नेपालका स्थायी कमिटी सदस्य समिप त्रिपाठीले दिनुभएको जानकारी अनुसार नेकपा(एककिृत समाजवादी)का अध्यक्ष माधवकुमार नेपालले प्रतियोगिताको उद्घाटन गर्नु हुनेछ । युवा संघ नेपालका केन्द्रीय उपाध्यक्ष नितेश पौडेलले शुभकामना मन्तव्य राख्नुभएको पत्रकार सम्मेलनमा आयोजकले दिएको जानकारी अनुसार प्रतियोगितामा न्युनतम ६० र अधिकतम १०० टिमको सहभागिताको रहने प्रतियोगिता बिहान सात बजेदेखि साँझ सात बजेसम्म सञ्चालन हुनेछ । प्रतियोगितामा सहभागिताका लागि एक टिमलाई पाँच हजार रुपैयाँ दर्ता शुल्क राखिएको छ ।
पाँच दिने प्रतियोगिता सञ्चालनका लागि लैनचौर ग्राउन्ड तय भइसकेको र अरु मैदानको पनि खोजी भइरहेको आयोजकले बताए ।
प्रतियोगिताको विजेताले तीन लाख रुपैयाँ पुरस्कार पाउनेछन् । उपविजेता हुने टिम दुई लाख र तेस्रो हुने टिम एक लाख रुपैयाँबाट पुरस्कृत हुनेछन् ।
