बनेपा । काभ्रे जिल्लाको बनेपामा तेस्रो बनेपा मेयर कप बागमती प्रदेशस्तरीय तेक्वान्दो प्रतियोगिता आयोजना हुने भएको छ । काभ्रे तेक्वान्दो आईटिएफ प्रतिष्ठान, बनेपाको आयोजनामा २०८२ सालको उक्त प्रतियोगिता यही १६ र १७ गते सञ्चालन गरिने आयोजकले जनाएको छ ।
बनेपा नगरपालिकाका प्रमुख शान्ति रत्न शाक्यको प्रमुख आतिथ्यतामा हुने प्रतियोगितामा बागमती प्रदेशअन्तर्गतका विभिन्न जिल्लाबाट आईटिएफ तेक्वान्दो खेलाडीहरूको सहभागिता रहनेछ ।
आयोजक संस्थाका अध्यक्ष राजमन्दिर श्रेष्ठका अनुसार प्रतियोगितामा काभ्रेपलाञ्चोकसहित सिन्धुपाल्चोक, भक्तपुर, काठमाडौं, ललितपुर, रामेछाप, मकवानपुर र सिन्धुली जिल्लाका खेलाडीहरूले प्रतिस्पर्धा गर्नेछन् ।
दुई दिनसम्म सञ्चालन हुने प्रतियोगितामा २५० भन्दा बढी खेलाडीहरूको सहभागिता रहने अनुमान गरिएको छ । प्रतियोगितामा उत्कृष्ट प्रदर्शन गर्ने खेलाडीहरूलाई शिल्ड, पदक तथा प्रमाणपत्र प्रदान गरिने आयोजकले जानकारी दिएको छ ।
