बेथानचोक। काभ्रेको बेथानचाेक गाउँपालिका वडा नम्बर ५ स्थित छिर्के- पनाैती नपा-११, लुकुवा माेटर बाटाे आज एक समारोहका बीच शिलान्यास भएको छ।
शिलान्यास कार्यक्रममा बेथानचोक गाउँपालिका -५ का वडाध्यक्ष राजकुमार वाइबा र पनौती नगरपालिका -११ का वडाध्यक्ष विपेन्द्र लामाले संयुक्त रुपमा शिलान्यास गर्नुभएको थियो।
शिलान्यास कार्यक्रममा बेथानचाेक वडा नम्बर ५ का अध्यक्ष राजकुमार वाइवाले याे छिर्के- लुकुवा माेटरबाटाे खाेल्न सकेकाे खण्डमा यहाँका जनताले छाेटाे दुरीमा आवतजावत गर्न पाउने भन्दै किसानकाे बारीमा फलेको तरकारी, फलफुल बजारसम्म लैजान सजिलो हुने बताउनु भयो । वडाबासीकाे विकासकाे चाहानामा आफू सधै लागिरहने बाचा गर्दै अध्यक्ष वाइवाले आगामी दिनमा गाउँपालिकाबाट पनि बजेट उपलब्ध गराउन पहल गर्ने प्रतिबद्वता व्यक्त गर्नुभयो।
कार्यक्रममा पनौती नगरपालिका वडा नम्बर ११ का अध्यक्ष बिपेन्द्र लामाले विकास सबैको आवश्यकता रहेको बताउँदै जनताले उपभाेग गर्ने सेवा सुबिधामा सधैं आफ्नो सहयोग रहने बताउनुभयो । यो पार्टी उ पार्टी नभनि संयुक्त रूपमा बाटो शिलान्यासकाे कार्यक्रम गर्न पाउँदा अपनत्व महशुस भएको भन्दै अध्यक्ष लामाले खुशि व्यक्त गर्नुभयो ।
यसैगरी कार्यक्रममा नेकपा माओवाद केन्द्रका नेता पेमा लामाले विकास निर्माणकाे कार्यमा फरक दल र बिचार नभनि एकताबद्ध भएर लाग्न आग्रह गर्नुभयो ।
नेपाल सरकार बाग्मती प्रदेशकाे १० लाख ७ हजार ५९७ लागतमा अल्छे भञ्ज्याङ - छिर्के - लुकुवा २ किलोमिटर माेटर बाटो निर्माण हुन लागेको हो । गत वर्ष पनि बाग्मती प्रदेशकाे १० लाख सहयोगमा लुकुवाबाट १ किलोमिटर ट्रयाक खुलिसकेकाे छ। यस वर्ष छिर्केबाट लुकुवा तर्फकाे ट्रयाक खाेल्ने कार्यकाे सुरुवात गरिएको हो ।
समाजसेवी टीकाप्रसाद हुमागाँइकाे सञ्चालनमा भएको कार्यक्रममा नेकपा (एकिकृत समाजवादी) काभ्रे जिल्ला कमिटी सचिवालय सदस्य हरिगोपाल प्रधानाङ्ग, सबै दलका प्रतिनिधिहरु, माेटर बाटो उपभोक्ता समितिका अध्यक्ष रेशमबहादुर तामाङ लगायत समितिका सदस्यहरु, नागरिक समाज, बुद्धिजीवी र स्थानीयकाे बाक्लो उपस्थित रहेको थियो ।
