बनेपा/नेपाल रेडक्रस सोसाईटी काभ्रेका नवनिर्वाचित पदाधिकारी र सदस्यको पदभार ग्रहण
नेपाल रेडक्रस सोसाईटी काभ्रे शाखाका नवनिर्वाचित सभापति लगायत पदाधिकारी र सदस्यले पदभार ग्रहण गरेका छन् । गत आइतबार निर्वाचित सभापति देवेन्द्र भैल लगायत पदाधिकारी र सदस्यहरुको आज एक समारोहका बीच पदस्थापन गराईएको हो ।
निवर्तमान सभापति रघुनाथ हुमागाईंले वर्तमान सभापति देवेन्द्र भैललाई र नवनिर्वाचित सभापति भैलले अन्य पदाधिकारी र सदस्यहरुलाई पदस्थापन गराउनुभएको थियो । कार्यक्रममा निवर्तमान कार्यसमितिले नवनिर्वाचित कार्यसमितिलाई माईन्युट हस्तान्तरण गरेको थियो ।
सो अवसरमा बनेपा नगरपालिका प्रमुख शान्तिरत्न शाक्य, निवर्तमान सभापति रघुनाथ हुमागाईं, पूर्वसभापति सोमप्रसाद हुमागाईं, रघुबर चौप्रधान, श्यामकुमार श्रेष्ठ, बनेपा - ७ का वडाध्यक्ष हिटलर शाक्य लगायतले शुभकामना व्यक्त गर्दै मानविय भावना सहित जनताको सुखदुःखमा काम गर्न आग्रह गर्नुभएको थियो । यस्तै नवनिर्वाचित सभापति देवेन्द्र भैलले रेडक्रसको भुमिका र संस्थागत विकासका लागि सबैसंग समन्वय गरेर अगाडि बढ्ने बताउनुभयो । पदस्थापनपछि समितिको पहिलो बैठक सम्पन्न गरिएको महिला उपाध्यक्ष पुष्पा खड्का बस्नेतले जानकारी दिनुभयो ।
