काठमाडौं । सत्तारूढ दलका प्रमुख सचेतकहरूले प्रतिपक्षी दलहरूको असहयोगका बाबजुद संसद् सञ्चालन अघि बढाउने अडान दोहोर्याएका छन्।
आइतबार संसद् गतिरोध अन्त्यका लागि सभामुख देवराज घिमिरेद्वारा बोलाइएको प्रमुख सचेतकहरूको बैठकपछि सञ्चारकर्मीहरूसँग कुरा गर्दै नेपाली कांग्रेसका प्रमुख सचेतक श्याम घिमिरेले विपक्षी दलहरूले सहकार्य नगरे पनि संसद् चल्ने बताएका हुन्।
‘आजबाट संसद् सञ्चालनमा आउँछ,’ घिमिरेले भने, ‘प्रतिपक्षबाट अहिलेसम्म कुनै निष्कर्ष वा निर्णय आएको छैन। यदि उनीहरूले सहयोग गरे राम्रो, नगरे पनि केही असहजता हुन सक्छ तर संसद् अघि बढ्छ।’
नेकपा एमालेका प्रमुख सचेतक महेश बर्तौलाले पनि यसअघि जस्तै सूचना टाँसेर संसद् स्थगित गर्ने अभ्यास दोहोरिने पक्षमा आफूहरू नरहेको बताए। ‘पहिला प्रमुख प्रतिपक्षी दलको आग्रहमा बैठक स्थगित गर्ने निर्णय गरिन्थ्यो, तर आजको बैठकमा भने त्यो दोहोरिँदैन,’ बर्तौलाले स्पष्ट पारे।
उनले आजैदेखि आगामी आर्थिक वर्षको बजेटमाथिको छलफल सुरु हुने जानकारी दिए।
नेकपा माओवादी केन्द्रका प्रमुख सचेतक हितराज पाण्डेसहितको छलफलमा सहभागी दलहरूले आफ्ना अडान यथावत् राखेपछि बैठक कुनै निष्कर्षमा पुग्न सकेन।
प्रतिनिधिसभाको बैठक आज दिउँसो १ बजेका लागि बोलाइएको भए पनि तोकिएको समयमा सुरु हुन सकेको छैन।
भिजिट भिसा प्रकरणमा गृहमन्त्री रमेश लखिमाथि छानबिन हुनुपर्ने माग गर्दै प्रमुख प्रतिपक्षी दलले संसद् अवरुद्ध गर्दै आएको छ। उक्त अवरोधका कारण आगामी आर्थिक वर्षको बजेटमाथिको छलफलसमेत प्रभावित हुँदै आएको छ।
