बनेपा । काभ्रे तेक्वान्दो आईटिएफ एकेडेमीले ‘प्रथम बनेपा मेयर कप तेक्वान्दो आईटिएफ च्याम्पियनसिप’ हात पार्न सफल भएको छ ।
काभ्रे तेक्वान्दो आईटिएफ एकेडेमीले बनेपामा दूई दिनसम्म आयोजना गरेको मेयर कप च्याम्पियनसिपमा आयोजक संस्था काभ्रे तेक्वान्दो आईटिएफ एकेडेमीले १४ स्वर्ण, ५ रजत र ७ कास्य पदकसहित प्रथम भएको हो ।
प्रतियोगितामा धुलिखेल तेक्वान्दो आईटिएफ डोजाङले १० स्वर्ण, ६ रजत र ३ कास्य पदकसहित दोस्रो र बनेपा तेक्वान्दो आईटिएफ डोजाङले ५ स्वर्ण, २ रजत र ३ कास्य पदकसहित तेस्रो भएका छन् । प्रतियोगितामा विजयी खेलाडी र समूहलाई बनेपा नगरपालिका प्रमुख शान्तिरत्न शाक्य, नगर उपप्रमुख विमला सापकोटा दाहाल र राष्ट्रिय खेलकुद परिषदका सदस्य अञ्जन धमलाले शिल्ड, मेडल र प्रमाणपत्र वितरण गर्नुभएको थियो ।
विजयी खेलाडीहरुलाई शिल्ड, मेडल र प्रमाणपत्र वितरण गर्नुहुँदै नगर प्रमुख शाक्यले स्वस्थ र अनुशासित बन्नका लागि हरेक व्यक्तिले खेल खेल्न आवश्यक रहेको बताउनुभयो । उहाँले खेल प्रतियोगितामा उत्कृष्ट हुने खेलाडीहरुलाई छात्रबृत्ति प्रदान गर्ने बताउनुभयो । खेलेर के पाउँछ भन्ने बुझाईमा रहेका आम अभिभावकलाई खेलेर उत्कृष्ट भएका खेलाडीहरुले छात्रबृत्ति पनि पाउन सकिन्छ भन्ने उदाहरण बनेपा नगरपालिकाले दिने उहाँले बताउनुभयो ।
बनेपा नगरपालिका उपप्रमुख विमला सापकोटा दाहालले प्रतियोगितामा सहभागी खेलाडीहरुलाई बधाई व्यक्त गर्नुहुँदै खेल आत्मरक्षाको लागि पनि खेल्न आवश्यक रहेको बताउनुभयो । विशेष गरी महिलाहरुलाई आत्मरक्षाका लागि आवश्यक भएको भन्दै सम्पूर्ण महिलाहरुलाई खेलक्षेत्रमा लाग्न आग्रह गर्नुभयो । ‘अझ पछिल्लो समयमा बालबालिकाहरु मोबाईलमा मात्रै झुम्मिएर बस्ने गरेको अवस्थाबाट टाढा राख्दै स्वस्थ र फुर्तिला बनाउनका लागि खेलक्षेत्रमा आवद्ध गराउन आवश्यक छ ।’
नेपाल आईटिएफ तेक्वान्दो महासंघका केन्द्रिय अध्यक्ष प्रविण कार्की आईटिएफ तेक्वान्दोको विकासका लागि संस्थागत रुपमा लागिरहेको बताउनुभयो । खुल्ला आकाशमुनि धेरै दुःख गरेर खेलाडी उत्पादन गर्दै राष्ट्रिय अन्तर्राष्ट्रियस्तरको खेलाडी उत्पादन गर्न काभ्रेले योगदान पुर्याएको भन्दै महासंघको काभ्रेको योगदानप्रति उच्च सम्मान रहेको बताउनुभयो ।
काभ्रे तेक्वान्दो आईटिएफ एकेडेमीका संस्थापक अध्यक्ष राजमन्दिर श्रेष्ठले तेक्वान्दो आईटिएफको विकास र आम खेलाडीहरुको विकासका लागि निरन्तर रुपमा लागिरहेको बताउनुभयो । खेलाडीहरुको विकास र क्षमता अभिबृद्धि गर्दै राष्ट्रिय रुपमा आफ्नो छवि बनाउनका लागि खेलाडी उत्पादन गर्ने र राष्ट्रको लागि योगदान दिन निरन्तर रुपमा लागिरहेको उहाँको भनाई छ ।
प्रतियोगितामा २०० जना भन्दा बढी खेलाडीहरु सहभागि थिए ।
