धुलिखेल/काभ्रेपलाञ्चोक जिल्लामा डेंगु संक्रमितकाे संख्या ६२ पुगेको छ ।
जिल्ला स्वास्थ्य कार्यालय, काभ्रेपलाञ्चोकले दिएको तथ्यांक अनुसार २०८१ साउन १ देखि भदौ १६ गतेसम्म जिल्लामा ६२ जना डेंगु संक्रमित फेला परेका छन् । जसमा डेंगु संक्रमित हुनेमा पुरुष २८ र महिला ३४ रहेका छन्।
जसमा पनाैतीमा सबैभन्दा धेरै १५ जना संक्रमित भेटिएका छन् । यस्तै बनेपा नगरपालिकामा १३ जना संक्रमित देखिएका छन् भने धुलिखेलमा १२ र भुम्लुमा ११ जना रहेकाे कार्यालयले जनाएकाे छ ।
पाँचखालमा २, नमाेबुद्धमा ३, मण्डनदेउपुरमा २, राेशीमा ३ र तेमालमा १ जनामा संक्रमण पुष्टी भएकाे छ । चार वटा गाउँपालिकाहरु खानीखाेला, बेथानचाेक, महाभारत र चाैरीदेउरालीमा भने संक्रमित भेटिएका छैनन् ।
जिल्ला स्वास्थ्य कार्यालय काभ्रेका प्रमुख रागिश्री कक्षपतिका अनुसार, भदौ महिना डेंगु संक्रमण बढी हुन सक्ने महिना हो । उनले संक्रमण नियन्त्रणको प्रत्येक शुक्रवार १० बजे १० मिनेट अभियान सञ्चालन गरिएको बताइन् । संक्रमण गराउने लामखुट्टे बस्न सक्ने सम्भावित स्थान खोज्ने र नष्ट गर्ने विधी नै ९० प्रतिशत प्रभावकारी भएको पाइएकोले सोही अनुसार अभियान थालिएको उनले जानकारी दिइन् ।
ल्याव टेक्निसियन निरिक्षक सिता श्रेष्ठका अनुसार, बढी डेंगु संक्रमण भएका देशभरका प्रमुख १० जिल्ला मध्ये बाग्मती प्रदेशका ५ जिल्ला काठमाडौं, भक्तपुर, चितवन, मकवानपुर, सिन्धुपाल्चोक रहेकाले पनि काभ्रे बढी जोखिममा छ ।
