रोशी । काभ्रे जिल्लाको रोशी गाउँपालिका-७ स्थित् रोशी माध्यमिक विद्यालयमा दुई दिने योग प्रशिक्षण सम्पन्न भएको छ । विद्यार्थीहरुका लागि मंगलटार आयुर्वेद औषधालयको आयोजनामा दुई दिने योग प्रशिक्षण सम्पन्न भएको हो ।
नागरिक आरोग्य अभियान अन्तर्गत `मेरो स्वास्थ्य मेरो जिम्मेवारी, योग गरौ निरोगी बनौ´ भन्ने नाराका साथ शुरु भएको योग प्रशिक्षण कार्यक्रममा रोशी माध्यामिक विद्यालयका ९,१० र ११ का४१ जना विद्यार्थीहरुलाई योग प्रशिक्षण दिएको आयोजकले जनाएका छन् ।
रोशी गाउँपालिकाका अध्यक्ष दिनेश लामाले चिकित्सा विज्ञानले नसकेको नशाजन्य रोग योगले निको पार्ने बताएका छन् । पछिल्लो समयमा योगले सबैतिरको मन जित्न सफल भएको र अन्तरास्ट्रिय योग दिवस मनाउन सफल भएको लामाले बताए । योगाले मेन्टल्ली र फिजिकल्ली स्वस्थ राख्न मद्धत गर्ने उनको भनाइ छ ।
रोशी माविका प्रधानाध्यापक बिन्दुप्रसाद ढुंगानाले रोग लाग्नु भन्दा रोग लाग्न नदिनको लागि योगले सहयोग गर्ने बताएका छन् । योगका लागि रोशी माबिलाई छनौट गरेकोमा धन्यवाद व्यक्त गर्दै सिकाइलाई सहि तरिकाले सदुपयोग गर्न ढुंगानाले अनुरोध गरे । भित्री शरीर सफा भएन भने बाहिरी शरीर मेकअप गरेर राम्रो भएर मात्र नहुने उनको भनाइ छ । योगले मानिसलाइ फूर्तिलो बनाउने र दीर्घजीवन बिताउन सक्ने खालको महसुस भएको विद्यार्थी तुलसी केसीले बताइन् ।
गाउँपालिकाका आयुर्बेद शाखा प्रमुख सबिता गौतमले तीन दिने कार्यक्रम दुई दिनमा सक्नु पर्ने भएकाले दिनमा तीन सिफ्ट गरेर सम्पन्न गरेको बताइन् । योग प्रशिक्षक पुन्जलाल श्रेष्ठ र मानसरोबर श्रेष्ठ दुई जनाले प्रशिक्षण दिएको उनले बताइन ।
