काठमाडौं । डा. चिन्तामणिनाथ योगीको आध्यात्मिक निबन्धसङ्ग्रह ‘चेतना यात्रा’ लोकार्पण गरिएको छ ।
नेपाल स्रष्टा समाजको आयोजनामा शनिबार राजधानीमा आयोजित कार्यक्रममा प्रा.डा. प्रेमनारायण अर्याल, प्रा.डा. भागवत ढकाल, वरिष्ठ साहित्यकार श्रीओम श्रेष्ठ ‘रोदन’, अम्बिका केसी तथा कृतिकार डा. योगीले संयुक्त रूपमा कृतिको लोकार्पण गरे ।
कृतिमाथि परिचर्चा गर्दै प्रा.डा. ढकालले ‘चेतना यात्रा’ गीताको आदर्शलाई आधार बनाएर लेखिएको कृति भएको बताए । जीवन, जगत् र समाजका लागि उपयोगी यस कृतिले पाठकको जीवनमा सकारात्मक प्रभाव पार्ने विश्वास व्यक्त गर्दै उनले भने, “ज्ञान, विज्ञान र चेतनाको समन्वय गर्दै जीवन र दर्शनलाई जोडिएको कृति आएको छ ।”
अर्का वक्ता पोखरा विश्वविद्यालयका प्रा.डा. अर्यालले डा. योगीसँगको पुरानो सम्बन्ध स्मरण गर्दै पोखरा विश्वविद्यालय अन्तर्गतका विभिन्न क्याम्पसहरूमा उनलाई प्रवचनका लागि आमन्त्रण गरिएको अनुभव साझा गरे ।
कृतिकार डा. योगीले अध्यात्म र दर्शनको पृष्ठभूमिमा कृतिको रचनागर्भबारे प्रकाश पार्दै आफू मातृभूमिको सेवक भएको उल्लेख गरे । उनले स्वान्तः सुखायका लागि लेख्ने गरेको बताउँदै भने, “म ॐकारको साधनामा छु । लेखक भएँ कि भएनँ, थाहा छैन ।”
कार्यक्रममा प्रा.डा. लक्ष्मणप्रसाद गौतम, वरिष्ठ साहित्यकार पवन आलोक, पूर्वप्रशासक अम्बिका केसी तथा भुँडीपुराण प्रकाशनका प्रबन्ध निर्देशक केशव पराजुलीले शुभकामना मन्तव्य व्यक्त गरे ।
नेपाल स्रष्टा समाजका अध्यक्ष श्रीओम श्रेष्ठ ‘रोदन’को अध्यक्षतामा सम्पन्न कार्यक्रममा शान्तिमाया गिरीले सहजीकरण गरेकी थिइन् भने शंकर भारतीले स्वागत मन्तव्य व्यक्त गरेका थिए ।
