नवलपुर । बिहीबार बिहानदेखि परेको हल्का वर्षाका कारण महेन्द्र राजमार्गअन्तर्गत नारायणघाट–बुटबल सडक अवरुद्ध भएको छ । धुलो बाटोमा हल्का वर्षा भएपछि हिलो र चिप्लो भएका कारण राजमार्गको दाउन्ने खण्ड बिहान ९ बजेदेखि अवरुद्ध भएको जिल्ला प्रहरी कार्यालय नवलपुरले जनाएको छ । अवरुद्ध सडक खुलाउन स्थानीय प्रशासनले खासै चासो नदिएको यात्रुहरुले अनावश्यक सास्ती व्यहोर्नु परेको छ। राती १० बजे दुम्किबास आइपुगेको पत्रकारको टोली सडक अवरुद्ध बिहानसम्म पनि नखुल्दा अलपत्र परेको हो। आदिवासी जनजाति पत्रकार महासङ्घको सङ्घीय महाधिवेशनमा भाग लिन लुम्बिनी हिडेका पत्रकारहरुको टोली यातायात अबरुद्ध भएकाेले बिहिबार राती १० बजेदेखि शुक्रबार बिहानसम्म दुम्किबासमा रोक्नुपरेको बताइएको छ। यातायात अबरुद्ध हुँदा फोनिजको संघीय महाधिवेशनमा भाग लिन आएको प्रतिनिधि/पर्यवेक्षकहरु समयमा कार्यक्रम स्थलमा पुग्न कठिनाई भएको पत्रकार पेमा लामा संघर्षले जानकारी दिनुभयो। काभ्रे, भक्तपुर, रामेछाप, सिन्धुपाल्चोक, दोलखा, काठमाडौं लगायत जिल्लाका प्रतिनिधिहरु सडक अवरुद्ध भएका कारण दुम्किबासमा रोकिएका छन्।
उक्त स्थानमा हिजोदेखि चैत ३१ गतेसम्म गाडी रोकेर बिस्तारको काम भइरहेको छ । बिहान ११ देखि दिउँसो ३ बजेसम्म गाडी चलाउन दिइएको छैन । गाडी चल्न दिने समयमा समेत अवरुद्ध भएपछि यो मार्ग भएर यात्रा गर्ने यात्रीले सास्ती भोग्दै आएका छन् ।
अवरुद्ध राजमार्ग खुलाउने प्रयास भइरहेको जिल्ला प्रहरी कार्यालयका प्रहरी नायब उपरीक्षक मधु नेपालले जानकारी दिनुभयो ।
