रुपन्देही । सञ्चार तथा सूचना प्रविधिमन्त्री पृथ्वीसुब्बा गुरूङले चैत मसान्तसम्म सामाजिक सञ्जाल फेसबुकहरू दर्ता नभए बन्द गर्ने चेतावनी दिएका छन् । शुक्रबार रुपन्देहीको लुम्बिनी बौद्ध विश्वविद्यालय हलमा सञ्चार तथा सूचना प्रविधिमन्त्री पृथ्वीसुब्बा गुरूङले महाधिवेशनको उद्घाटन कार्यक्रमलाई सम्बोधन गर्दै सामाजिक सञ्जालले नेपालमा दर्ता नगरे बन्द गर्ने चेतावनी दिएका हुन्।
सञ्चारमन्त्री गुरुङले भने, ‘हामीले मेटालाई दर्ताको सूचना दिएको २ महिना भैसक्यो । तर, कुनै जवाफ आएको छैन । चैत मसान्तसम्म दर्ता नभए बन्द गर्छौं ।’
सञ्चारमन्त्री गुरूङले सामाजिक सञ्जालमा जथाभावी स्क्यामहरू आइरहेकोले यसलाई नियन्त्रण गर्न दर्ताका लागि अनुरोध गर्नुपरेको बताए । उनले सामाजिक सञ्जाल अरु देशमा दर्ता भएर चल्ने गरेको र राजश्व पनि तिर्दै आएकाले नेपाल सरकारलाई पनि त्यो आवश्यक रहेको उनको भनाइ थियो ।
उनले सामाजिक सञ्जालबाहेकका अनलाइन मिडियाहरू बन्द गर्ने सरकारको कुनै मनसाय नरहेको भन्दै चलाउन कुनै रोकतोक नहुने बताए । ‘सरकारले अनलाइन मिडियाहरू पनि बन्द गर्दैछ/नियमन गर्दैछ भन्ने हल्ला जुन चलेको छ, त्यो भ्रम हो । संविधानमा दिएको प्रेस स्वतन्त्रताको हक कायम हुन्छ ।’
उहाँले सकेसम्म आम सहमतिका आधारमा संविधान संशोधन हुने बताए । गुरुङले संविधान संशोधन सबैको दायित्व र अपनत्वको विषय होस् भन्ने आफूहरुले चाहेको र यसका लागि अधिकतम सहमति खोज्ने बताएका हुन् ।
मन्त्री गुरुङले दुईतिहाई दम्भमा संविधान संशोधन गर्न खोजेको भन्ने कुरामा कुनै सत्यता नरहेको उल्लेख गरे ।
कांग्रेस–एमालेबीच कार्यदल बनाएर करिब १० वर्षको अवधिमा संविधान कार्यान्वयन गर्दाको सबल र दुर्बल पक्षको समीक्षा गर्दै विषयहरु पहिल्याउने कार्य भइरहेको उनले बताए ।
गुरुङले संशोधनका लागि पहिचान भएका साझा विषयहरुलाई साझा एजेण्डा बनाउँदै प्रतिपक्षी दलहरुसँग छलफल हुने उल्लेख गरे ।
कार्यक्रमका प्रमुख अतिथि समेत रहेका पृथ्वीसुबा गुरूङले संघीय फोनिजको स्मारिका विमोचन गरिएको छ भने काठमाडौंको क्यालेण्डर विमोचन गरिएको छ ।
कार्यक्रममा फोनिजमा रही योगदान पुर्याएका पत्रकारहरूलाई सम्मान गरिएको छ ।
फोनिजका संघीय अध्यक्ष गजुर्धन राइको अध्यक्षतामा भएको कार्यक्रममा नेपाल पत्रकार महासंघका केन्द्रीय सचिव सविन प्रियासन चौधरीले गणतन्त्रमा पत्रकारलाई जिउँदै जलाउनु लोकतन्त्रमाथिको प्रहार भएको बताए । उनले भने, ‘ पत्रकारहरू गणतन्त्रमा जिउँदै जलाइनु लोकतन्त्रको अपमान हो। जुनसुकै समूह होस्, गणतन्त्रमा हिंसात्मक प्रदर्शन गर्न मिल्दैन।’
लुम्बिनीमा आयोजित कार्यक्रममा फोनिजका संघीय समिति, , ८ प्रदेश, ६६ जिल्ला, ८ जातिय संस्थागत सदस्य र ८ प्रवास समितिबाट ५१७ जना प्रतिनिधिहरु तथा पर्यवेक्षकहरू उपस्थित भएका छन् ।
फोनिजको आठौं राष्ट्रिय महाधिवेशनले नयाँ नेतृत्व चयन गर्नेछ ।
