काठमाडौं । नियात्राकार छविरमण सिलवालको नवीनतम नियात्राकृति ‘अमेरिकाको घाम’ लोकार्पण गरिएको छ। बुधबार राजधानी काठमाडौंमा आयोजित कार्यक्रममा वरिष्ठ साहित्यकार श्रीओम श्रेष्ठ ‘रोदन’ सहित विभिन्न साहित्यकार र सर्जकहरूको उपस्थितिमा कृतिको लोकार्पण गरिएको हो।
कार्यक्रममा बोल्दै वरिष्ठ साहित्यकार रोदनले सिलवालका नियात्राले पाठकलाई अमेरिका, युरोप र चीनसम्मको यात्रा अनुभूति गराउने क्षमता राखेको बताए। उनले कृतिमा यात्राका अनुभवलाई जीवन्त ढंगले प्रस्तुत गरिएको उल्लेख गरे।
त्यसैगरी भुँडीपुराण प्रकाशनका प्रबन्ध निर्देशक केशव पराजुलीले कृति मीठासपूर्ण रहेको र पाठकको मन जित्ने विश्वास व्यक्त गरे। लेखक सिलवाल यसअघि दश वटा कृतिहरू प्रकाशित गरिसकेका छन् भने ‘अमेरिकाको घाम’ उनको दोस्रो नियात्राकृति हो।
कृतिभित्र विभिन्न शीर्षकका १३ वटा नियात्रा समावेश गरिएको छ। समीक्षक राजकुमार बानियाँका अनुसार सरल, सहज र संवेदनशील भाषासँगै कहिलेकाहीँ देखिने काव्यात्मक प्रस्तुतीले यात्रावृत्तान्तलाई आकर्षक बनाएको छ।
साहित्यकार कुमारी लामाले जीवनका हरेक क्षणलाई उत्सवझैँ प्रस्तुत गर्न सिपालु लेखक सिलवालले ‘अमेरिकाको घाम’ मार्फत पाठकलाई रमाइलो यात्रामा सहभागी गराउन सफल भएको टिप्पणी गरिन्।
‘अमेरिकाको घाम’ भुँडीपुराण प्रकाशनद्वारा प्रकाशित कृति हो, जसको मूल्य रु. २७५ निर्धारण गरिएको छ।
