काभ्रे । जिल्ला प्रशासन कार्यालय काभ्रेपलाञ्चोकमा आज आईतबारदेखि निःशुल्क टोल फ्रि नंबर सेवा सुरु गरिएको छ । कार्यालयबाट प्रवाह हुने सेवालाई थप प्रभावकारी बनाउन उक्त सेवा सुरु गरिएको प्रमुख जिल्ला अधिकारी रुद्रादेवी शर्माले बताउनुभयो ।
सेवाको उद्घाटन गर्नुहुँदै प्रमुख जिल्ला अधिकारी रुद्रादेवी शर्माले कार्यालयमा सेवाग्राहीको समस्या, गुनासोलाई समयमै समाधान गर्न र कार्यालयलाई सल्लाह–सुझावसमेत प्राप्त गर्न उक्त सेवा सञ्चालनमा ल्याइएको जानकारी दिनुभयो।
प्रजिअ शर्माका अनुसार टोल फ्रि नंवरमा कल गर्दा सेवाग्राहीलाई शुल्क नलाग्ने र जुनसुकै सेवाप्रदायक सिम वा फोनबाट पनि सम्पर्क गर्न सकिनेछ । ‘सेवाग्राहीबाट प्राप्त भएको गुनासोको लिखित रुपमा समेत राखी क्रमशः समाधान गर्दै लगिनेछ’, शर्माले भन्नुभयो । उक्त सेवा दैनिक बिहान ८ बजेदेखि बेलुका ६ बजेसम्म सञ्चालनमा रहनेछ । टोल फ्रि नम्बर १८१०५०००३७७ रहेको छ ।
