बनेपा/जिल्ला सहकारी संघ लिमिटेड काभ्रेपलाञ्चोकको ४३ औं बार्षिक साधारण सभाको सम्पन्न भएको छ ।
संघका अध्यक्ष दिलिप शर्माको सभापतित्वमा भएको बार्षिक साधारण सभामा प्रमुख अतिथि बागमती प्रदेशका सांसद कञ्चन चन्द्र बादे श्रेष्ठले सहकारी संस्थाका ऋण उठाउन आवश्यक कानून बनाउनेबारे प्रदेश सभामा छलफल भइरहेको बताए । पूर्व मन्त्री समेत रहेका बादेले सहकारीमा ऋण नउठेको कारण बचत फिर्ता हुन नसकेकोले त्यसलाई सम्बोधन गर्न कानून निर्माण गर्न प्रदेश सभामा छलफल भइरहेको जानकारी दिए ।
प्रदेश सभा सदस्य बादेले सहकारीहरूलाई नियम कानून मिचेर काम नगर्न सचेत गर्नुहुँदै केही बदनाम सहकारीका कारण सिंगो सहकारी अभियान नै धरासायी हुने चिन्ता बढेको बताउनुभयो ।
जिल्ला समन्वय समिति काभ्रेका प्रमुख दिपककुमार गौतमले सहकारीले भूईमान्छेको पक्षमा काम गर्नुपर्नेमा पछिल्लो समय यस्तो नदेखिएको बताए । केही सिमित मान्छेको मुठ्ठीमा सहकारी पुगेको कारण समस्या आएको उनको भनाइ थियो।
बनेपा नगरपालिका प्रमुख शान्तिरत्न शाक्यले सहकारी क्षेत्रमा देखिएको समस्या निराकरणको लागि नगरपालिकाले काम गरिरहेकाे र नगरपालिकाभित्र रहेका २०४ मध्ये एक सयको हाराहारीमा मात्रै सक्रिय रहेको जानकारी दिनुहुँदै बनेपामा रहेका करिब २० देखि २२ प्रतिशत सहकारीमा समस्या रहेको बताए ।
राष्ट्रिय सहकारी महासंघका सञ्चालक सुमन नेपालले केही सहकारीमा समस्या आएको नाममा समग्र सहकारीलाई आरोप लगाउन नहुने बताए । उनले सहकारी संस्थामा फसेको ऋण उठाउन सरकारी निकाय, जनप्रतिनिधिले पनि आवाज उठाइदिनुपर्ने बताए । बचत कर्ताको बचत सुरक्षित हुने बातावरण बनाउन अनुरोध गर्नुभयो । समुदायमा आधारित सहकारीलाई जोगाउन आवश्यक रहेको उहाँको भनाई थियो ।
राष्ट्रिय सहकारी महासंघ सञ्चालक समितिका सदस्य सुमन नेपालले महिलालाई सहकारीको नेतृत्वमा ल्याउन कन्च्युस्याई गर्न नहुने बताउनुभयो । सबै सहकारीलाई एउटै दृष्टिले नहर्न उहाँको सुझाव थियो ।
कार्यक्रममा संघका अध्यक्ष शर्माले आफ्नो चार वर्षे कार्यकालको प्रगती प्रतिवेदन प्रस्तुत गर्नु भएको थियो । वार्षिक साधारण सभा तथा स्थापना दिवस कार्यक्रमको सञ्चालन संघका सचिव निरञ्जन विष्टले गर्नु भएको थियो ।
औपचारिक कार्यक्रमपछि भएको निर्वाचनमा अध्यक्षका लागि वर्तमान उपाध्यक्ष अमन पोटे श्रेष्ठ र कोषाध्यक्ष राजन शाक्य चुनावी प्रतिस्पर्धामा छन् ।
अमनको प्यानलबाट उपाध्यक्षमा शान्ती लामा, उपाध्यक्ष (महिला) मा मिरा सत्याल, सचिवमा यदुनाथ हुमागाई, कोषाध्यक्षमा अर्जुनप्रसाद सापकोटा छन् । अमनको प्यानललाई नेपाली कांग्रेस, नेकपा (माओवादी केन्द्र) र नेकपा (एकिकृत समाजवादी) निकट सहकारीकर्मीको समर्थन छ ।
राजनको प्यानलबाट उपाध्यक्षमा ठाकूरनाथ अधिकारी, उपाध्यक्ष (महिला) मा राधिका दाहाल घिमिरे, सचिवमा प्रकाश वञ्जारा, कोषाध्यक्षमा हिमाली श्रेष्ठ छन् । एमालेको समर्थनमा राजनको प्यानलले एक्लै प्रतिस्पर्धा गरेका छन्।
