चौरीदेउराली/नेपाल कम्युनिष्ट पार्टी चौरी देउराली गाउँपालिका-७, को वडास्तरीय दोस्रो बैठक सम्पन्न गरेको छ । नेकपा पोलिटब्युरो सदस्य कान्छाराम तामाङको प्रमुख आतिथ्यतामा एवं केन्द्रीय सदस्य तथा नेकपा काभ्रे जिल्ला इन्चार्ज बिन्दु सीको विशेष आतिथ्यतामा कार्यक्रम सम्पन्न भएको हो ।
प्रशिक्षण कार्यक्रममा बोल्दै प्रमुख अतिथि कान्छाराम सीले संसदीय व्यवस्थामा संसद भित्र भएका राजनीतिक पार्टीका नेताहरु कुर्सीको लागि हानथापमा छन् भन्नुहुँदै सरकार परिवर्तन गर्ने र गठबन्धन बनाउने तथा भत्काउने कार्यमा व्यस्त रहेको बताउनुभयो। विप्लव देश र जनतालाई नयाँ अर्थदृष्टिकोण दिदै उत्पादन र श्रमसंग नजोडिएको नेता र राजनीतिक पार्टीले समग्र देशको नेतृत्व गर्न नसक्ने विचार राखिरहेकाे जानकारी दिनुहुँदै कान्छारामले यदि आत्मनिर्भर देश भएन भने विदेशीहरुको अधिनस्थ देश बन्ने खतरा रहेको औँल्याउनुभयो ।
गणतन्त्र प्राप्तिपछि जनताको स्तर माथी उठ्दै जानुपर्नेमा झन् दयनीय भएको भन्दै उनले यसको सही समाधान नेपाली विशेषताको समाजवाद रहेको उद्घोष गर्नुभयो। उहाँले नेता तथा कार्यकर्तालाई जनमूखी हुन र देशमा बढिरहेको भ्रष्टचार, महङ्गी र कालाबजारीको विरुद्ध सङ्घर्ष गर्न समेत आग्रह गर्नुभयो ।
यस्तै कार्यक्रममा नेकपा केन्द्रीय सदस्य तथा जिल्ला इन्चार्ज बिन्दु सीले पार्टीप्रति आम जनताको आशा र भरोसा बढेको भन्दै अबको बाटो समाजवादको हुने र त्यसको नेतृत्व नेकपाले गर्ने बताए ।
कार्यक्रममा नेकपा केन्द्रीय सल्लाहकार समितिबाट दिपक सी र सिद्दीबहादुर सी, केन्द्रीय सदस्य जितबहादुर सि, बनेपा नगर इन्चार्ज रामहरि बुढाथोकी, जिल्ला सदस्य सलाम सिंह सि लगायतले पार्टीलाई सुझावसहित मन्तव्य राखेका थिए ।
कार्यक्रमको सभापतित्व वडा सेक्रेटरी रमेश सी, सह-सेक्रेटरी तिर्थ सिले सञ्चालन गरेका थिए । कार्यक्रममा नवप्रवेशी जिल्ला इन्चार्ज बिन्दु सीले स्वागत गर्नुभएको थियो।
