बनेपा। बाग्मती प्रदेश स्तरीय खेलकुद प्रतियोगिताको काभ्रेबाट २२० जना खेलाडीबनेपा। बाग्मती प्रदेश स्तरीय खेलकुद प्रतियोगिताको काभ्रेबाट २२० जना खेलाडी छनोट भएका छन् ।
जिल्ला स्तरीय छनोट प्रतियोगिताबाट ती खेलाडी प्रदेश स्तरीय प्रतियोगिताका लागि छनोट भएका हुन् ।
विभिन्न विधामा छनोट भएका खेलाडीहरुलाई बागमती प्रदेश सभा सदस्य रुकु चौलागाईले प्रमाणपत्र वितरण गरेको जिल्ला खेलकुद विकास समितिका अध्यक्ष मानविय वाइवाले जानकारी दिनुभयो ।
छनोटमा परेका खेलाडीले जेठ ७ देखि मकवानपुरमा सञ्चालन हुने प्रदेश स्तरीय खेलकुद प्रतियोगितामा सहभागिता जनाउने छन् ।
यसैबीच प्रदेश खेलकुद विकास परिषद्ले आज हेटौँडामा पत्रकार सम्मेलन गरी दोस्रो संस्करणको सो प्रतियोगिताबारे जानकारी गराएको छ ।
प्रतियोगिताका लागि रु ९ करोड ४२ लाख खर्च हुने बागमती प्रदेश खेलकुद परिषद्का सदस्य सचिव सूर्यलाल भण्डारीले जानकारी दिए । प्रतियोगितामा १३ खेलका विभिन्न विधामा खेलाडीबीच प्रतिस्पर्धा हुने छन् । यीमध्ये उसु र जुडो काठमाडौँमा, पौडी ललितपुरको सातदोवाटोमा तथा क्रिकेट चितवनमा खेलाइनेछ ।
फुटबल, भलिबल, एथलेटिक्स, तेक्वान्दो, कराँते, बक्सिङ, रग्वी, ब्याडमिन्टन र आइटिएफ तेक्वान्दोका खेल हेटौँडाका विभिन्न खेल मैदानमा खेलाइने सदस्य सचिव भण्डारीले बताए। प्रतियोगिताको उद्घाटन बागमती प्रदेशका मुख्यमन्त्री शालिकराम जम्कट्टेलले गर्ने तय भएको छ ।
प्रतियोगितामा विभिन्न बिधामा गरी एक हजार ७५ महिला, एक हजार चार सय २७ पुरुष खेलाडी, एक सय ७३ प्रशिक्षक, एक सय ४२ व्यवस्थापक र दुई सय ७६ निर्णायकको सहभागिता रहने सदस्य सचिव भण्डारीले बताए । पत्रकार सम्मेलनमा बागमती प्रदेशका सामाजिक विकासमन्त्री कुमारी मोक्तानले विभिन्न खेलकुद प्रतियोगितासँगै प्रदेश सरकारले पूर्वाधार निर्माणमा जोड दिएको बताए ।
