काठमाडौं। दार्चुला कला–साहित्य तथा ‘किशनसिंह धामी : व्यक्ति र कृति’ नामक दुई कृतिको लोकार्पण कार्यक्रम काठमाडौंमा सम्पन्न भएको छ। नेपाल स्रष्टा समाजद्वारा आयोजित कार्यक्रममा वरिष्ठ साहित्यिक पत्रकार नगेन्द्रराज शर्मा, डा. तारा निरौला, श्रीओम श्रेष्ठ ‘रोदन’, प्रा. डा. खगेन्द्र लुइँटेल, किशनसिंह धामी, पवन आलोक, प्रा. डा. लक्ष्मणप्रसाद गौतम, प्रा. डा. भरतकुमार भट्टराई, प्रमोद प्रधान, ज्ञानु अधिकारी तथा कृतिकार नेत्रप्रसाद फुयललगायतका व्यक्तित्वले संयुक्त रुपमा कृति विमोचन गरे।
प्रमुख अतिथि वरिष्ठ साहित्यिक पत्रकार शर्माले नेपाली भाषा–साहित्यको विकासका लागि निरन्तर गतिविधि आवश्यक रहेको बताए। विदेशमा रहेर नेपाली भाषा, साहित्य र संस्कृतिको प्रवर्द्धनमा लेखक किशनसिंह धामीले गरेका योगदानको उनले प्रशंसा गरे।
कार्यक्रममा लोकार्पित कृतिहरूमाथि समालोचक प्रमोद प्रधान तथा प्रा. डा. भरतकुमार भट्टराईले कार्यपत्र प्रस्तुत गर्दै कृतिबारे विस्तृत समीक्षा गरे।
शुभकामना मन्तव्यका क्रममा विभिन्न अतिथिहरुले धामीले साहित्यिक क्षेत्र र पहिचान संरक्षणमा पु¥याइरहेको योगदानको उल्लेख गरे।
नेपाल स्रष्टा समाजका केन्द्रीय अध्यक्ष श्रीओम श्रेष्ठ ‘रोदन’को सभापतित्वमा सम्पन्न कार्यक्रम समाजका महासचिव प्रकाश घायलको स्वागत मन्तव्यबाट सुरु भएको थियो। कार्यक्रमको सञ्चालन सदस्य प्रदीप सापकोटाले गरेका थिए। औपचारिक सत्र अघि सुदूरपश्चिमको सांस्कृतिक झाँकी पनि प्रस्तुत गरिएको थियो।
