पनौती/१४ औं नेवाः राष्ट्रिय एकता दिवस ऐतिहासिक एवम् सांस्कृतिक रुपले महत्व बोकेको नगर पनौतीमा मनाउने तयारी अन्तिम चरणमा पुगेको छ ।
हरेक वर्ष मनाउँदै आएको नेवाः राष्ट्रिय एकता दिवस यसपटक पोहेलाथ्व नवःमि अर्थात् माघ ५ गते शुक्रवार परेको छ ।
काभ्रेपलाञ्चोक जिल्लाको पनौतीमा यसपटक नेवाः राष्ट्रिय एकता दिवस मनाउनको लागि सरोकारवालाहरुको भेला गरी आवश्यक तयारी गरिरहेको आयोजक सुरेश सैजुले जानकारी दिनुभयो।
नेवाः देय् दबूको संयोजनमा विभिन्न राजनीतिक दल निकट नेवारहरूको जातिय संगठनहरुलाई समेत सहभागी गराइ संयुक्त रुपमा एकता दिवस भव्यताका साथ मनाउन लागिएको बताइयो। यो दिवसलाई नेवारहरुले साह्रै महत्व दिदै आएको छ ।
यस अघि स्थानीय तहमा सानोतिनो कार्यक्रम गरी मनाउँदै आएको भएपनि केन्द्रीय कार्यक्रमको रुपमा उपत्यका बाहिर नेवाः राष्ट्रिय एकता दिवस पहिलो पटक पनौतीमा मनाउन लागिएको हो। नेवाः देय् दबू काभ्रे जिल्ला समिति, नेवाः देय् दबू पनौति नगर समिति, हलिं नेवाः गुथि काभ्रे जिल्ला समिति, हलिं नेवाः गुथि पनौति नगर समिति, नवलकचा नवाल समाज, भिन्तुना ग्रुप पनौति लगायत विभिन्न संघसंस्थाहरुको आयोजनामा हुन लागेकाे नेवाः राष्ट्रिय एकता दिवसमा पनौती, बनेपा र धुलिखेल नगरका प्रमुखहरु, बागमती प्रदेशका सभासद् कन्चन चन्द्र बादे लगायत नेवारसँग सम्बन्धित विभिन्न संघसंस्थाका प्रतिनिधिहरुको सहभागिता रहने जानकारी सैजुले दिनुभयो।
शुक्रबार माघ ५ गते शुक्रवार हुने राष्ट्रिय नेवाः एकता दिवसको पदयात्रा ११.३० बजे शुरु भइ १ बजे लायकु डबलीमा औपचारिक कार्यक्रम शुरू हुने आयोजकले जनाएको छ।
