बनेपा/क्षितिज इङ्लिस बोर्डिङ स्कूल बनेपाले १६ औं वार्षिकोत्सव विभिन्न कार्यक्रम आयोजना गरी मनाएको छ । दुईदिनसम्म चल्ने वार्षिकत्सवको पहिलो चरणको कार्यक्रममा बनेपा नगरका नगर प्रमुख शान्तिरत्न शाक्यले सम्बोधन गर्दै निजि विद्यालयको शिक्षा क्षेत्रमा महत्वपूर्ण योगदान गरेको र क्षितिज स्कुलले यसमा ईंट्टा थप्ने काम गरेको बताउनुभयो । उहाँले आगामी दिनमा बनेपा नगरपालिकाले निजि विद्यालयहरुसंग मिलेर सहकार्य गरेर अगाडि बढ्न चाहेको पनि बताउनुभयो ।
यसैगरी विशेष अतिथि बनेपा नगरपालिकाका उपप्रमुख बिमला सापकोटा दाहालले बनेपा नगरपालिकामा ७० प्रतिशत विद्यार्थी निजि विद्यालयमा अध्ययनरत रहेको र ३० प्रतिशत मात्र सामुदायिक विद्यालयले धानेको टिप्पणी गर्दै शिक्षाको मागलाई निजीक्षेत्रले पनि उत्तिकै टेवा प¥याएको बताउनुभयो । उपप्रमुख दाहालले आफु पनि यस विद्यालयको अविभावक रहेको बताउँदै गुणस्तरीयतामा कुनै शंका नरहेको जानकारी दिनुभयो ।
कार्यक्रममा विद्यालय संचालक समितिको तर्फबाट कृष्णप्रसाद तिमल्सिना, विद्यालय व्यवस्थापन समिति उदयराय कायष्ठ, विद्यालयका पिन्सिपल लिलाधर पौडेल लगायतका वक्ताहरुले वार्षिकत्सव विद्यार्थीहरुको रचनात्मक र सृजनात्मक क्षमतालाई प्रस्तुत गर्ने एक अवसरका रुपमा यो कार्यक्रम रहेको, विद्यार्थीहरुलाई विद्यालय शिक्षासंगै रचनात्मक कृयाकलापमा पनि संलग्न बनाउँदै अगाडि बढाउने प्रतिवद्धता सहित शुभकामना मन्तव्य राख्नुभयो ।
विद्यालय सञ्चालक समितिका अध्यक्ष हरि गोपाल प्रधानाङ्गले कार्यक्रमको अध्यक्षतामा गर्दै शिक्षालाई समयानुकुल बनाउन क्षितिज स्कुलले सबै उपायहरु अपनाउँदै अगाडि बढेको बताउनुभयो । सोही अवसरमा विद्यार्थीहरुले आफ्नो विविध प्रतिभा प्रस्तुत गरेका थिए । कार्यक्रममा नर्सरीदेखि कक्षा ५ तहका विद्यार्थीहरु र अभिभावकहरूको उपस्थिति रहेको थियो । नर्सरीदेखि कक्षा ५ सम्मका उत्कृष्ट विद्यार्थीलाई नगरप्रमुख शान्ति रत्न शाक्य र उपप्रमुख बिमला सापकोटाले पुरस्कार वितरण गर्नुभएको थियो।
