काठमाडौं । सामाजिक सञ्जाल बन्द र शासकीय अव्यवस्थाविरुद्ध सुरु भएको जेन–जी आन्दोलनले सोमबार बेलुकी नयाँ मोड लिएको छ। आन्दोलनकारीहरूले राज्यका तीनै अंग — व्यवस्थापिका संसद, कार्यपालिका सिंहदरबार र न्यायपालिका सर्वोच्च अदालत — कब्जा गर्दै भवनहरूमा तोडफोड र आगजनी गरेका छन्।
नयाँ बानेश्वरस्थित संसद भवन पूर्ण रूपमा आन्दोलनकारीको नियन्त्रणमा पुगेको छ। भवनभित्र रहेका सबै भौतिक संरचनामा क्षति पुर्याइएको छ भने आगजनी समेत गरिएको छ।
यस्तै, सर्वोच्च अदालत, महान्याधिवक्ताको कार्यालय, नेपाल बार एसोसिएसन, काठमाडौं जिल्ला अदालतलगायतका निकायमा प्रदर्शनकारी प्रवेश गरी तोडफोड गरेका छन्। अदालत परिसरमा समेत आगजनी भएको छ।
सिंहदरबार परिसरमा पनि आन्दोलनकारीले प्रवेश गरेर तोडफोड गरेका छन्। स्थिति नियन्त्रणबाहिर गएपछि सुरक्षा निकाय र प्रशासनिक प्रमुखहरूले संयुक्त विज्ञप्ति जारी गर्दै अवस्था गम्भीर भएको स्वीकार गरेका छन्। उनीहरूले समाधानका लागि सबै पक्षलाई संयमता अपनाउन अपिल गरेका छन्।
