धुलिखेल/जिल्ला कारागार काभ्रेमा रहेका बन्दीका लागि बुधबार ५ सय थान पुस्तक हस्तान्तरण गरिएको छ। बन्दीलाई कानूनी तथा शैक्षिक जनचेतना जगाउनुका साथै पढ्ने बानीको विकास गर्ने उद्देश्यले पुस्तक हस्तान्तरण गरिएको टिम नेपोका का. अध्यक्ष प्रदिप गिरीले बताए।
“केही समययता पुस्तक परियोजनाअन्तर्गत विभिन्न विद्यालयमा पुस्तकालय स्थापना गर्दै आएकाेमा विद्यालयमा प्रदान गरिएका पुस्तकप्रति विद्यार्थीको रुचि नदेखिएका कारण ४ वर्षदेखि कारागार केन्द्रित गरेकाे अध्यक्ष गिरीले बताए ।
पहिलोपटक अर्घाखाँची जिल्ला कारागारका बन्दीलाई पुस्तक हस्तान्तरण गरेको संस्थाले अहिले देशभर रहेका कारागारमा क्रमशः पुस्तक सहयोग गर्दै जाने योजना अन्तर्गत ९ वटा जिल्लाका कारागारहरुमा पुस्तक हस्तान्तरण गरिसकेको का. गिरी जानकारी दिए ।
कार्यक्रमका प्रमुख अतिथि धुलिखेल नगर उप-प्रमुख निराजन जंगमले कारागारलाई हाम्रो समाजले नकारात्मक दृष्टिले हेर्छ। यसलाई सुधार्नभन्दा समाजभन्दा अलग राख्न चाहान्छ। त्यसैले कारागारलाई रुपान्तरण गर्न जरुरी छ” भन्नुभयो । अपराध ‘रोग’ जस्तै भएको भन्दै त्यसलाई ज्ञानको माध्यमबाट उपचार गर्न सकिने उपप्रमुख जंगमको भनाई थियो।
विभिन्न सङ्घसंस्था तथा व्यक्तिमार्फत सङ्कलन गरिएको पुस्तक टिम नेपोले प्रत्येक कारागारमा चारदेखि ५ सयका दरले सहयोग गर्ने गरेको पनि सो अवसरमा टिम नेपोका सदस्य अमृत बिष्टले जानकारी दिए। टिम नेपोले कारागारका कैदीलाई लक्षित गरी पुस्तक प्रदान गरी सहयोग गरेको कारागार प्रमुख परशुराम थापाले बताए। “कारागारमा प्राप्त पुस्तक बहुउपयोगी हुने विश्वास लिएको छु”, प्रमुख थापाले भने।
